Մեր տված փայտից կրակ են անում, տուն տաքացնում, թոնիրը վառում, կերակուր եփում, փափուկ հաց թխում, ուտում կշտանում, բայց մեզ չեն հիշում, մեզ չեն պահպանում, այլ անգութ կերպով մեզ կոտորում են, մեզ փչացնում, ոչնչացնում:
Մեր գերաններից շինում են տներ, գոմեր, մարագներ, ժամեր ու վանքեր, մեր տախտակներից ՝ հատակ, առաստաղ, աթոռ, պահարան, սեղան, նստարան, դուռ ու պատուհան և այլ շատ տեսակ կահ և կարասիք. բայց մեզ չեն հիշում, մեզ չեն պահպանում, այլ անգութ կերպով մեզ կոտորում են, մեզ փչացնում, ոչնչացնում:
Կամուրջ են շինում ՝գետերով անցնում. սայլեր են շինում ՝ ամեն ինչ կրում. գութան են շինում, հողերը հերկում. լուծ, սամի շինում, եզ, գոմեշ լծում, օրորոց շինում ՝ մանկիկ օրորում. քանոն են շինում ՝ տետրակներ տողում, նավեր են շինում ՝ ծովի մեջ լողում, բայց մեզ չեն հիշում, մեզ չեն պահպանում, այլ անգութ կերպով մեզ կոտորում են, մեզ փչացնում, ոչնչացնում:
Ով չի տանձ կերել կամ կարմիր խնձոր, նուռ ու սերկևիլ, կեռաս ու սալոր, դեղձ կարմրաթշիկ, ծիրան անուշիկ: Ապա խաղողը. և քանի տեսակ կանաչ ու կարմիր, թուխ — թուխ ու սպիտակ, և այդ ամենը մարդիկ են ուտում…
Բայց մեզ չեն հիշում, մեզ չեն պահպանում, այլ անգութ կերպով մեզ կոտորում են, մեզ փչացնում, ոչնչացնում:
Խելո՛ք մանուկներ, դուք որ մեծանաք, մեծ մարդիկ դառնաք, մեզ խնայեցե՛ք, մեզ պահպանեցե՛ք և ձեր հանդերում, ձեր այգիներում ծառեր տնկեցե՛ք…
Առաջադրանքներ
Պատմվածքից ի՞նչ և ինչիպիսի՞ հարցերին պատասխանող հնգական բառ դո՛ւրս գրի՛ր։
Ի՞նչ —հաց, տուն, նստարան,գետ, առաստաղ:
Ինչպիսի՞ —կարմիր, կարմրաթշիկ, անգութ, անուշիկ, թուխ:
Տրված բառապակապցություններով նախադասություններ կազմի՛ր։
խելոք մանուկներ, փափուկ հաց
Մեր դպրոցում սովորում են շատ խելոք մանուկներ:
Երեք տարեկան տղան համտեսեց փափուկ հաց:
Գտի՛ր և գրի՛ր տրված բառերի հոմանիշները։
կերակուր-սնունդ
կշտանալ-հագենալ
անգութ-անխիղճ
շինել-կառուցել
խելոք-խելացի
մանուկ-երեխա
հանդ-արտ
հերկել-ակոսել
Ծառի անունից մի գանգատ (բողոք ) էլ դո՛ւ գրի՛ր։
Այս դաժան քամին կոտրում է իմ ճյուղերը ու թափում տերևներս:
Իսկ հիմա էլ բողոք գրի՛ր օճառի, թեյնիկի, գլխարկի կամ ակնոցի անունից:
Օճառ լինելն էլ լավ բան չի: Որովհետև լվացվելու ժամանակ ինձանից օգտվելուց ես հալվում եմ: